Mar 1 | KPG | STEP | Deenei di Longo Humalia o Jesus Christ, Tama a God.

a 1.2:Mal 3.1

b 1.3:Is 40.3

c 1.6:2 Kgs 1.8

d 1.11:Gen 22.2; Ps 2.7; Is 42.1; Mt 3.17, 12.18; Mk 9.7; Lk 3.22

e 1.15:Mt 3.2

f 1.22:Mt 7.28-29

g 1.39:Mt 4.23, 9.35

h 1.44:Lev 14.1-32

Mark 1

Di agoago a John Babdais

(Matthew 3.1-12; Luke 3.1-18; John 1.19-28)

1 Deenei di Longo Humalia o Jesus Christ, Tama a God. 2 E daamada be di hagi aga a soukohp Isaiah dela gu hihi,

“God ne helekai boloo: Au ga hagau dagu dangada kae hegau i oo mua e hagatogomaalia doo ala! ^a
3 Tangada e wolowolo i lodo di anggowaa boloo: Goodou hagatogomaalia ina di ala o Dimaadua. Haga huudonu ina di ala dela e hana iei mee.” ^b

4 Malaa, John ga gila mai i lodo di anggowaa, e hai ana babdais mo di agoago: “Huli gi daha mo godou huaidu, gi babdais, gei God ga dumaalia i godou huaidu.” 5 Dogologowaahee mai Judea mo di waahale o Jerusalem, ne hula belee hagalongo gi nia agoago a John. Digaula ne haagi nadau ihala, gei mee ga babdais digaula i lodo di monowai Jordan. 6 John e gahu i nia gahu ngaahulu ‘camel’, e hai dono duu gili kau i dono huaidina, ana meegai la nia manu-‘locust’, mo nia meegai maangala o lodo henua. ^c 7 Mee ga haga iloo gi nia daangada, “Taane dela ma ga hanimoi i ogu muli, la koia e aamua i di au. Gei au hogi hagalee tau di bala gi lala e wweedee nia suudi o maa. 8 Au e babdais goodou gi nia wai, gei mee ga babdais goodou gi di Hagataalunga Dabu.”

Di babdais mo di hagamada o Jesus

(Matthew 3.13—4.11; Luke 3.21,22; 4.1-13)

9 Di madagoaa hua deelaa, gei Jesus ga hanimoi i Nazareth, tama waahale i tenua Galilee, ga babdais go John i di monowai Jordan. 10 Di madagoaa hua Jesus ne hanaga gi daha mo nia wai, mee ga mmada gi di langi gu mahuge, di Hagataalunga Dabu e haneia i ono nua, e dina gi di mwuroi. 11 Gei di lee ga lee eia i di langi, “Goe go dagu Dama daane e aloho iei au. Au e tentene adu gi di goe.” ^d 12 Di madagoaa hua deelaa, gei di Hagataalunga Dabu ga hai a Jesus gi hana gi di anggowaa, 13 ga noho i golo nia laangi e madahaa, nogo hagamadamada go Satan. Gei nia manu o lodo henua e noho labelaa i golo, gei nia daangada di langi e loomoi e hagamaamaa a mee.

Jesus e gahi ana gau wagadaha dogohaa

(Matthew 4.12-22; Luke 4.14,15; 5.1-11)

14 I muli John ne haga ulu gi lodo di hale galabudi, gei Jesus ga hana gi Galilee, ga hagadele di Longo Humalia o God. 15 Mee ga helekai, “Di madagoaa gu dae mai! Tenua o God gu hoohoo mai! Huli gi daha mo godou huaidu, hagadonu ina di Longo Humalia. ^e 16 Di hanadu hua o Jesus la taalinga Tai o Galilee, ga gidee ia nia daangada hai iga dogolua, Simon mo dono duaahina daane Andrew, e dadaabui nau iga gi di gubenge. 17 Jesus ga helekai gi meemaa, “Lloomoi, daudali mai au, gei au ga aago goolua gi di haangodo gi nia daangada.” 18 Meemaa gu limalima gu diiagi nau gubenge, gu hula i muli o mee. 19 Jesus ga hanadu hua haga balua, ga gidee labelaa tagahaanau daane dogolua, James mo John, nia dama daane ni Zebedee. Meemaa e bonobono di nau gubenge i hongo di nau boodi. 20 Di madagoaa hua Jesus ne gidee meemaa, ga gahigahi meemaa, gei meemaa ga diiagi di nau damana Zebedee mo ana gau ngalua i hongo di boodi, ga hula i muli o Jesus.

Taane iai di hagataalunga huaidu

(Luke 4.31-37)

21 Jesus mo ana dama agoago e hula gi di waahale o Capernaum, ga dau mai di Laangi Sabad, gei Jesus ga ulu gi lodo synagogee, ga daamada ga agoago. 22 Digau ala ne longono, la gu goboina huoloo i ana agoago, i mee hagalee e agoago be digau haga dondonu haganoho. Ana agoago le e mogobuna. ^f 23 Nomuli hua, gei taane dela iai di hagataalunga huaidu i ono lodo, ga hanimoi gi lodo synagogee, ga wolowolo, 24 “Ma di aha dela ga hai kooe mai gi gimaadou, Jesus o Nazareth? Goe ne hanimoi gi kinei belee hagahuaidu gimaadou? Au e iloo eau goe: goe go Tangada Dabuaahia a God dela ne hagau mai!” 25 Jesus ga helekai, “Hudee leelee, ulu gi daha mo taane deenaa!” 26 Di hagataalunga huaidu ga haga bolebole taane deelaa, ga wolowolo, ga ulu mai gi daha mo mee. 27 Nia daangada huogodoo gu goboina huoloo, ga leelee i nadau mehanga, “Ma di aha deenei? Ma di agoago hoou deenei? Taane deenei le e mogobuna, mee e helekai hua gi nia hagataalunga huaidu, gei digaula e hagalongo gi mee!” 28 Di longo o Jesus gu limalima hua gu dele i nia guongo o Galilee hagatau.

Jesus e hagahili ana gau magi dogologo

(Matthew 8.14-17; Luke 4.38-41)

29 Jesus mo ana dama agoago e hagatanga i synagogee, e hula ginaadou mo James mo John, gi di hale o Simon mo Andrew. 30 Tinana di lodo o Simon e moe magi welengina i hongo dono moenge. Di dau hua o Jesus i golo, gei digaula ga hagi anga di ahina gi mee. 31 Gei Jesus ga hanadu gi mee, ga kumi di lima o maa, ga haga duu gi nua a mee, dono magi gu hili, gei mee ga daamada ga hai hegau gi digaula. 32 Ga hiahi ia di mee, nia daangada ga laha mai nadau gau magi, mono gau iai nia hagataalunga huaidu gi Jesus. 33 Digau huogodoo mai di waahale deelaa ga dagabuli mai gi mua di hale deelaa. 34 Gei Jesus ga hagahili digau dogologo ala e magi i nia hagadilinga magi, gei gu hagabagi nia hagataalunga huaidu e logo. Mee ga bule nia hagataalunga huaidu aalaa, bolo gi hudee leelee, idimaa, digaula e iloo a mee.

Jesus e hagadele di Longo Humalia i lodo o Galilee

(Luke 4.42-44)

35 Heniheni dono daiaa, Jesus ga ala, ga ulu gi daha mo di hale. Geia ga hana gi daha mo tama waahale deelaa, ga hana gi di gowaa e lomo, e dalodalo. 36 Gei Simon mo ono ehoo ga hula, ga halahala a mee. 37 Di nadau gidee a mee, ga helekai, “Digau huogodoo e halahala goe.” 38 Jesus ga helekai gi digaula, “Gidaadou e hula labelaa gi nia waahale ala e hoohoo mai. Au belee hai agu agoago labelaa i golo, idimaa, deelaa dagu mee ne hanimoi ginai.” 39 Malaa, mee ga hana laa lodo Galilee, e agoago i lodo nia synagogee, mo di hagabagibagi ana hagataalunga huaidu. ^g

Jesus e hagahili dana daane

(Matthew 8.1-4; Luke 5.12-16)

40 Taane magi genegene ga hanimoi gi Jesus, ga bala gi lala i mua o mee, ga dangi i di hagamaamaa, “Maa goe e hiihai, heia mua au gi madammaa.” 41 Jesus gu aloho i mee, ga bili gi mee, ga helekai, “Au e hiihai. Madammaa!” 42 Digi duai, gei di magi gu hili i taane deelaa, gei mee gu madammaa. 43 Gei Jesus ga hagau a mee ga bule gi mee, 44 “Hagalongo, goe hudee hagi anga ina gi tangada di mee deenei ne hai. Hana hua haga huudonu gi tangada hai mee dabu gi haga dina ina goe. Nomuli, gei goe ga hai tigidaumaha a Moses bolo gi heia, gi iloo ai nia daangada, bolo goe gu madammaa.” Gei mee ga hagau taane deelaa gi hana. ^h 45 Gei taane deelaa ga hana hua ga hagadele di longo gi nia madagoaa huogodoo, ga hidi ai Jesus ga deemee di hana i lodo nia waahale. Gei mee ga nohonoho hua i nia gowaa lomo, gei nia daangada o nia gowaa huogodoo gu loloomoi gi mee.